Heyzli qadınla qüsl almadan öncə yaxınlıq etmək
Heyzlə qan kəsiləndən sonra və qüsl almamışdan qabaq yaxınlıq etmək caizdirmi?
Caizdir. Lakin ehtiyat müstəhəb, bu işi tərk etməkdir.
Qeyri-müctəhidin qazılıq mənsəbini öz öhdəsinə götürməsi
Cameüş-şərait müctəhid olmayan bir yerdə müctəhid olmayan şəxsin qəzavət mənsəbini öhdəliyə götürməsi caizdirmi?
O şəhərdə cameüş-şərait müctəhid yoxdursa, qəzavət işlərində və hüquqi normalar barəsində məlumatı olan elm əhlindən istifadə olunmalıdır, hərçənd onların məlumatı təqlid yolu ilə olsa belə.
Evlənmək üçün istixarə açmaq
Qızın elçilərinə cavab vermək üçün istixarə etməyin bir eybi varmı?
Əgər lazımi araşdırma və məşvərətdən sonra problem həll olmasa, istixarədən istifadə etmək olar.
Sürmə çəkmək, gözəl saat və eynək taxmaq
Sürmə sürtmək, qaş aldırmaq, əqiq üzük, saat, gözəl tibbi eynək qadınlar üçün örtülməsi vacib olan zinət hesablanırmı?
Zahirən qadağan olunmuş zinətlərdən deyil.
Qızın vəlisi ilə əlaqə yaratmağın qeyri-mümkün olması və ya onun qeyri-məntiqi şəkildə razılıq verməməyi
Əgər qız və oğlan müvəqqəti əqd oxumaqla bir-biri ilə (cinsi rabitə və duxul olmamaq şərti ilə) iş və təhsildə adi rabitədə olmaq istəyirlərsə, xahiş edirik ki, aşağıda fərz olunan iki halda qızın atasının icazəsinin hökmünü bəyan edin: 1) Qızın vəlisi (başçısı, qəyyumu) ilə əlaqə yaratmaq mümkün deyil və şəri baxımdan münasibətin tənzimlənməsi zəruri və təcilidir.2) Əlaqə yaratmaq mümkün olsa da qızın vəlisi qeyri-məntiqi formada bu işin əleyhinə çıxır və əsla razılıq vermir.
Hər bir halda ehtiyat vacib qızın vəlisindən icazə almaqdır. Əlavə olaraq, təcrübə göstərir ki, bu münasibətlər - xüsusilə cavanlarda, adətən məhdud və müəyyən bir həddə sabit qalmır və tədricən genişlənərək çoxlu problemlərin yaranmasına səbəb olur.
Vəkil tərəfindən müvəkkilin qarşı tərəfinə yol göstərilməsi
Əgər vəkil insaniyyət baxımından və məhkəmədə müvəkkilinin qarşı tərəfinin haqqı tapdalanmasın deyə, müqabil tərəfə yol göstərib ona məsləhət versə və öz hazırkı vəkalətindən istefa verdiyi təqdirdə onun vəkilliyinin digər bir şəxsə tapşırılacağını və nəticədə münaqişədəki müqabil tərəfin şəri haqqının tapdalanacağını, belə ki, məhsuldar iş həyatı boyu zəhmətlə əldə etdiklərinin hamısının aradan gedəcəyini hiss etsə, müvəkkilin qarşısında, habelə məhkəmədə müqabil tərəfin qarşısında olan vəzifəsi nədir?
Məzluma yol göstərmək hamı üçün caizdir, hətta sözü gedən halda vacib olması da mümkündür və xəyanət sayılmır (müvəkkil zahirdə qanuna uyğun söz danışsa da), lakin belə hallarda müvəkkildən zəhmət haqqı almağa haqqı yoxdur.
Üzrlü olan üçün gecə rəmyi-cəmərat etmək
Mənim kimilər üçün gündüz rəmyi-cəmərat etmək mümkün deyil. Biz gecələr rəmy edə bilərikmi? Cavabın müsbət olmasını fərz etsək, mənimlə birgə olanlar da gecə rəmyi-cəmərat edə bilərlərmi?
Gecə rəmyi-cəmərat edə bilərsiniz. Lakin sizinlə birlikdə olanlar üçün (gündüz rəmy etmək) mümkündürsə, gündüz rəmy etsinlər.
Livat edənin həddi-buluğa çatmasında olan şəkk
Bir şəxs bir oğlan uşağı ilə livat etmişdir. Lakin şəkki var ki, bu əməli edəndə həddi-buluğa çatmışdı, ya yox. O oğlan uşağının bacısı, qızı və ya anası ilə evlənməsi caizdirmi?
Əgər livat işini edənin həddi-buluğa çatmasında şübhə varsa, həmin oğlan uşağının bacısı, anası və ya qızı ona haram olmur.
Xəstəliyinə görə əməlləri yerinə yetirməyə qadir olmayan şəxs
Xəstəlik və s. səbəblər üzündən Mina əməllərini, təvafı, səy əməlini və Məkkə əməllərini yerinə yetirməyə qadir olmayan şəxsin vəzifəsi nədir?
Bu şəxs məhsur hökmündədir. Lakin naib tuta bilərsə, bu iş (naib tutmaq) həcci təkrar yerinə yetirmək əvəzindən kifayət edər və sonrakı il həcci təkrar yerinə yetirməsi lazım (vacib) deyil.
Livatda evlilik
Livat edən şəxsin (cəzalandırılmasında) evli (cinsi yaxınlıq üçün imkanlı) olmasını şərt bilirsinizmi?
Livatda evli və subay arasında fərq yoxdur.
Libas üzərindən əl verib görüşmək
Paltarın üzərindən naməhrəmlə əl verib görüşməyin hökmü nədir?
Ləzzət və reybə qəsdi olmasa, libas üzərindən toxunmağın eybi yoxdur.
Kağız salfetinə və yazılı kağıza səcdə etmək
Kağız salfetinə və ya üzərində xətt çəkilmiş kağıza səcdə etmək olarmı?
Kağız salfetinə, habelə xətləri olan kağız vərəqə səcdə etmək caizdir. Bu şərtlə ki, xətlər alnın kağıza çatmasına maneçilik törətməsin və ya xətlər arasında səcdə səhih olan miqdarda məsafə olsun.
Uşağın ana qanından qidalanmasında məqsəd
436-cı məsələdə qeyd etmişsiniz ki, “Heyz, hər ayda, bir neçə gün müddətində, qadınların bətnindən xaric olan bir qandır. Nütfə bağlanan zaman uşağın qidasıdır.” Bu məsələ aşağıda şərhi verilən məsələləri nəzərə almaqla elmi meyarlarla müvafiq deyil. Buna görə də xahiş edirik ki, daha artıq izah edəsiniz. Hər bir baliğ qadında yaisəlikdən öncə aylıq adət dövrü adətən aşağıdakı mərhələlərdən ibarətdir:1) Rəhimin (uşaqlığın) həcminin artması dövrü. Bu mərhələdə qadının bətni strogen hörmonlarının ifrazı nəticəsində qalınlaşır. Bətnin divarlarının qalınlaşması onun uşağı qəbul etməsi üçün hazırlaşmasına görədir. 2) Hamiləlik baş verərsə və rüşeym əmələ gələrsə, mövcud rüşeym bətnin borularından keçib bətnə daxil olur. Bu qalın və qanla dolu layı özünə yuva seçir. Rüşeym burada bir müddət qan vasitəsi ilə daşınan qida maddələri ilə qidalanır və inkişaf edir. Həqiqətdə rüşeym qida kimi qanın özündən qidalanmır. Yalnız qan vasitəsilə nəql olunan oksigen və qida maddələrindən istifadə edir. 3) Yuva seçimindən təxminən üç həftə sonra ciftin əsası qoyulur. Burada ciftin vəzifəsi bətnin qalınlaşmış toxumalarından oksigen və qida maddələrini alıb göbək bəndi vasitəsilə rüşeymə ötürməkdir. Habelə rüşeymin həyat fəaliyyətlərindən əmələ gəlmiş karbon qazlarını ananın qanına ötürür. Ciftin digər vəzifəsi isə analıq hormonlarının ifrazıdır ki, bu da aylıq adətin qarşısını alır. 4) Hamiləlik baş verməsə bətnin qalınlaşmış və qanla dolu divarları xarab olaraq sökülməyə başlayır ki, bu da aylıq adət adı ilə məşhurdur. Qanaxma qurtarandan sonra bətnin divarları yenidən rüşeymin qəbul edilməsinə hazırlaşır. Yəni qalınlaşmağa və qanla dolmağa başlayır. Buna görə də qadın hamilə olanda yuxarıda sözü gedən xas hormonların ifrazı üzündən adətən qanaxma keçirmir. (Nəinki, rüşeym o qanı yeyir.) Yəni əsas etibarilə qanaxma baş vermir ki, rüşeym onu yesin. 5) Yuxarıda sadalanan bütün mərhələlərə müxtəlif hormonların ifrazı sayəsində nəzarət olunur. Əgər bu hormonları iynə və ya yemək vasitəsilə qadına təzriq etsək, aylıq qanaxma baş verməyəcəkdir. Bütün bunları nəzərə alsaq qanı hansı şəkildə uşağın qidası adlandırmaq olar?
Burada bətnin divarlarının qan sızdırdığı və rüşeymin onu yediyi nəzərdə tutulmamışdır. Məqsəd budur ki, hamiləlik zamanı qan ananın damarlarında toplanır, cift vasitəsilə və ya digər yolla rüşeymə ötürülür. Qida maddələrini və oksigeni rüşeym həmin ana qanından alır. Necə ki, süd verən zaman adətən aylıq adət baş vermir. Çünki, qanın bir hissəsi südə çevrilib körpənin yeməyi olur. Əgər desək ki, qan uşağın yeməyidir, məqsəd sizin yazdığınız yox, bu mənadır.
Təyin olunmuş qazılar
Təyin olunmuş qazılar barəsində öz mübarək nəzərinizi bəyan edin.
Adil olan müctəhidlərin qəzavəti qətidir. Şəri məsələləri bilən qeyri-müctəhidin qəzavəti isə, cameüş-şərait müctəhidin tapılmadığı halda məqbuldur.
