Namazı düz öyrənə bilməyən qocalar
Namazında çoxlu səhvə yol verən və onları düzəltməyə qadir olmayan qoca qarının namazının hökmü nədir?
Öyrənməyə qadir deyilsə, hansı şəkildə qıla bilirsə, elə də qılsın.
Nafilə niyyəti ilə müstəhəb namaz
Xüsusi qılınma qaydası olan müstəhəb namazları (məsələn, vəhşət namazı) gündəlik namazların nafiləsinin yerinə hesablamaq olarmı?
Əgər bu namazla nafilə niyyəti etsə, nafilə hesablanır. Bu xüsusi namazın savabına çatmasına da ümid var.
Valideynin qəza namazlarının böyük oğula vacibliyi
Meyyitin qəza namaz və orucları həyat yoldaşlarının hər birindən olan hər böyük oğluna vacibdir, yoxsa onlardan birinin öhdəsinədir? Böyük övlad özü onları əncam vermək istəməsə, namaz və orucların pulunu öz (irs) hissəsindən verməlidir, yoxsa malın əslindən çıxmalıdır?
Hansı qadından olursa olsun, yaşca böyük oğlanın öhdəsinə düşür. O, öz malından, şərti ilə əcir tuta bilər. Əgər iki övlad yaş baxımından tamamilə bərabər olsalar, öz aralarında bölməlidirlər.
Sidik üçün qoyulan kisənin bulaşdığı hallar
Bir şəxsin bövlü və ya nəcisi ixtiyarsız ondan xaric olur. Kisə vasitəsilə bunun sair yerlərə yayılmasının qarşısını alır. Namazdan əvvəl kisə nəcisə bulaşarsa, onu dəyişmək vacibdirmi? Əgər kisə pak olsa və namaz halında nəcis və ya bövl ixtiyarsız ondan xaric olarsa, hökm nədir?
Bövl və ya qaiti dalbadal çıxan şəxs gərək hər dəstəmazdan sonra dərhal namaza başlasın. Ehtiyat namazı, yaddan çıxmış səcdə və təşəhhüdü yerinə yetirmək üçün yenidən dəstəmaz almaq lazım deyil. Bu şərtlə ki, namazla bu işlər arasında fasilə salmasın. Namaz halında (nəcisə) bulaşmış kisəni üstündə saxlaması namazı batil etmir.
Şöhrət libası
Şöhrət paltarı nə deməkdir? Bu geyimdən istifadənin hökmü nədir?
Şöhrət libası deyəndə elə paltar geymək nəzərdə tutulur ki, zöhd (zahidlik) və müqəddəsliklə məşhur olsun. Riyakarlıq üzündən olsun. Belə geyimdən istifadə etmək şəriət baxımından işkallıdır.
Məhcur olmayan borclu şəxsin müamiləsinin haramlığı
Cənab ustad, ümumiyyətlə, hansı şərtlərlə məhcur olmayan borclu şəxsin müamiləsini nüfuzlu saymırsınız?
Hər bir halda nüfuzludur. Lakin (bu müamilə) borcu qaytarmaq üçün olan imkanının əldən getməsinə səbəb olarsa, haramdır.
Qədim qəbiristanlıqda yenidən ölü basdırmaq
Bir qəbiristanlıqda dəfn olunan meyyitlərin dəfn olunmasından 100 il keçirsə, yenidən orada ölü basdırmaq olarmı?
Əgər meyyitlərin qalıqları aradan getmişdirsə, eybi yoxdur.
Mütəmadi şəkildə qan ləkəsi görən qadın
Bir neçə ay mütəmadi şəkildə ləkə görən qadının hökmü nədir? Bunu da əlavə etmək lazımdır ki, həkimlər ehtimal verirlər ki, bu qanlar daxili yaralarla bağlıdır.
Məsələnin iki şəkli var. Əgər bu qanın yara, çiban və uşaqlığın qanı olması sübuta yetsə qüslü yoxdur, və adi haldakı kimi dəstəmaz almalı və namaz qılmalıdır. Lakin bətnin arizələrindən irəli gəlirsə istihazədir. Belə ki, azacıq ləkə görmək həddində az olarsa, hər namaz üçün dəstəmaz alması lazımdır, Qüslü də yoxdur. Bədəni yumalı, namaz qılmalıdır. Əgər qanın cərəyanı olsa, qüsl vacib olur. (Bir qüsl sübh namazı üçün, bir qüsl zöhr və əsr namazları üçün və üçüncü qüsl məğrib və işa namazları üçün.) Əgər qüslün ona zərəri və ya kəskin məşəqqəti varsa təyəmmüm ala bilər.
Qızının və həyat yoldaşının naibliyi
Bir kişi onun üçün həcc yerinə yetirməyi vəsiyyət etmişdir. Qızı və ya arvadı onun əvəzinə naib olub həcci yerinə yetirə bilərmi?
Müəyyən bir şəxsi öz vəsiyyətnaməsində qeyd etməmişdirsə, qızı və həyat yoldaşı da onun əvəzində naib ola bilərlər.
Cümə qüslünün qəzası
Cümə qüslünün qəzası barədə dəlil-sübut varmı?
Bəli. Bu barədə hədis var ki, şənbə günü günbatana kimi onun qəzasını yerinə yetirmək olar.
Qızılın qızılla müamiləsi
Qiymət artımı ilə qızılın qızıla satılmasının hökmü nədir? Bu kimi müamilələrin şəri cəhətdən həlli yolu nədir?
Belə hallarda qızılı satmaq üçün ən yaxşı yol budur ki, ayrı-ayrılıqda iki müamilə bağlansın. Məsələn, 1 kq qızılı bir milyon yüz min tümən nəqd pula satsınlar və alver məclisində pulu alıb qızılı versin, sonra 1 kq qızılı ki, bir ilin başında təhvil veriləcək, bir milyona ondan alsın. Nəticə bu olacaq ki, qızılın sahibi bu iki müamilə ilə öz qızılını il başında yüz min tümən əlavə pulla alacaqdır.
